Monday, March 9, 2009

عندما كان الكبار تلامذة - 6/1/2009

بسم الله الرحمن الرحيم
السلام عليكم ورحمة الله وبركاته


في البدء أحببت أن أنوه بما أن الكتاب عباره عن قصص وأحداث فإنا لن ذكر القصة كاملة هنا في مدونتنا إنما سنذكر رقم الصفحة اللتي وردت بها ...


س: الكتاب في كلمتين؟


مهرة: من وحي الطفولة
هبه: قصص تلاميذ
مشاعل: حكايات تلاميذ
أبرار: قصص, ذكريات
نجد: كبار تتلمذوا
هيفاء: كانوا تلاميذ


س:أكثر قصة أثرت فيكم?


هبه: العقاد و المسألة الرياضية "تحكي القصة" صفحة 86
هيفاء: بنت الشاطيء .. كيف انه المقابلة غيرت حياتها .. أي أحد يعطيك نصيحة لا تستهينين فيها فكري فيها
هبه: القرضاوي لما جاله مدرس و سأل كل واحد ايش تبغى تصير في المستقبل " تحكي القصة "صفحة 76 - 77
نجد: الغزالي يعرب و أستاذه يبكي " تحكي القصة "صفحة 8
مهرة: موقف طه حسين مع الآية
نجد :حسن البنا و استاذه " تحكي القصة "صفحة 31 .. انه غرس فيه حب القراءة ...ما وصل اليه البنا كان من أستاذه
هيفاء: السفرجلاني لما قال كونوا مستقيمين كشجر الحور لا كعمود الكهرباء أحببت هذه العبارة كثيراً


س: موقف صار لك انتي مع أستاذة لا زال إلى الآن يؤثر فيك؟؟


مهرة: الموقف خلاني أحقد على المدرسة .. كانوا دايم يختارون للحفلات مجموعة معينة .. فمرة عينوا استاذات مختلفات يختارون.. فقالت مين بيي يقرا ؟؟ فرفعت يدي .. و مرة أعجبها اسلوبي في الإلقاء و راحت نادت الأستاذة الثانية .. سمعتني و قالت لا لا خلاص نستخدم البنات اللي دايم نطلعهم !!!
نجد : اذكر استاذتي بالثانوي .. القيت قصيدة و انبهرت بأسلوبي لانه اول مره اقراها وكانت باسلوب جيد.. مسكتني الإذاعة أسبوع ؛)..موقف اخر في المتوسط كان عندنا نشاط يوم الثلاثاء .. كانت كل المدرسة تطلع في الساحة و اختاروني الاستاذات اني أمثلهم في حوار مباشر و أسأل الاستاذات و الطالبات .. كنت جريئه وقتها و قعدت أمسك المايك و أقدمهم .. ممكن لو قدمت برنامج حواري في المستقبل يكون هذا الموقف له البصمة الأولى؛)ممكن
هبه :خامس ابتدائي .. كانوا يحاولوا يدوروا على مواهب عشان يطلعوهم في الحفلات .. فطلعت و قلت انشودة .. فعينوا علي اني بكون من ضمن اللي ينشدون .. فصرت أتفنن في الانشاد و أظهر مواهبي .. و فجأة في الفصل كذا يقولوا قومي انشدي .. هذا خلاني اشارك في الحفلات .. بعدين جربوا معاي في التقديم و صرت أقدم .. استمر هذا الأمر إلى المتوسط و الثانوي .. في ثالث ثانوي كنت مقدمة برنامج الحفل و كنت انشد و كنت أدرب البنات .. كانوا يطلعوني من الحصص عشان أمسك التدريب .. هذا خلاني اندفع
مشاعل: أذكر استاذة الدين في المتوسط .. كنت مرة فاهمة في المادة و كانت تقعد و تقولي يالله اشرحي !!
هبه : كلمة توديع الطنطاوي للطلبة .. كانت كلمة أثرت فيني صراحة .. أين معلموا اليوم من هذه الآداب والأخلاق ؟؟؟
نجد :مما يدعو للأسف أن يتحول المعلم إلى مجرد موظف !!
العمليه التعليمية على قولهم باضت .. الطالب يدرس عشان الشهادة فقط
مهرة: المشكلة انهم حددوا المناهج
هبه :خايفين يكون فيه ..... ما لاحظتوا في الكتاب هذا المدرس توجهه كذا و كذا .. فما يبغون كل واحد يطلعله منهج و يصير هذولا حزب فلان و هذولا حزب علان
نجد:بعدين تحولت فعلاً مهنة المعلم إلى اقل المهن للأسف
هبه:عشان ما فيها محفزات
نجد:ما صار لها قيمة .سابقا عندهم كان فعلاً شيخ و يخرّ ج لنا عالم !!
هبه :اللي حط المنهج حطه على التوجه اللي هو يبغاه .. ما استشار !!
مشاعل: محتوى مناهجنا هي هي محتوى مناهج بريطانيا و اليابان !! العلم هو ما يتغير بس في طريقة عرض المعلومة و اعطاء المعلومة تختلف
نجد :اليوم مثلاً لما درسنا بدينا نشغل عقلنا .. حسينا باختلاف .. لما الأستاذة تطلع عشان تجيب ورقة بالعادة نستغلها بالسواليف .. لكن المرة هذي كنا نتناقش !!..
مشاعل :المشكلة مو في المعلومات .. المشكلة في الطالب و المعلم
هبه :المعلومات اللي موجودة كلها سطحية في المناهج الآن !!
موقف نورة : اللي غير حياتي كنت أسمع قرآن عند أستاذة فجت مرة قالت لي و كنا بنبدا رمضان قالت ها خلاص بتختمين في رمضان ان شاء الله قلت ها و انا كنت لسا في سورة البقرة راحت و حسيت فيه جبل على صدري و رحت و جلست و ضاق صدري حسيت انه شي يخوف لما رجعنا البيت قالت اختي وش رايكم نختم في رمضان .. و صارت تحسب كم صفحة نحفظ كل يوم .. فمن كلمة بس أثرت فيني ! والحمد لله أني اتممت ختم كتابه هبه : المدرس المفروض يحاسب ايش الكلمة اللي يقولها للطالب .. لأنه أي كلمة تقولها للطالب يذكرها لكن الأستاذ ينساها
هيفاء :في موقف أثر فيني أعطاني حافز .. استاذتنا حقت الكيمياء.. كنت العام ما شاء الله ما أفتح الكتاب و آخذ 10 من 10 .. كانت المعلومة تدخل من جد .. في هذي السنة ناخذ نفس المعلومات .. و إذا أخذنا أشياء جديدة نشارك فيها !!! مرة شاركت و قالت لي انا بالذات: ما ضاع تعبي فيك يا هيفاء السنة اللي فاتت .. حبيت الأستاذة مرة و حبيت حصتها من جد!!
أبرار :أنا كنت إلى ثاني ابتدائي صلاتي خرابيط .. لكن في ثالث ابتدائي أستاذتي سوت لنا جداول صلاة .. اللي جدولها يكتمل و حتى لو ناقص .. تعطيها جائزة .. فمنها هي تعودنا كلنا على الصلاة !!
نجد :في موقف مع نزار قباني لخليل مردمبك : إنه لمن نعمة الله علي و على شعري معاً, أن معلم الأدب الأول الذي تتلمذت عليه, كان شاعراً من أرق وأعذب شعراء الشام, وهو الأستاذ خليل مردم بك. هذا الرجل ربطني بالشعر منذ اللحظة الأولى, حين أملى علينا في أول درس من دروس الأدب مثل هذا الكلام المصقول كسبيكة الذهب:
إن التي زعمت فؤادك ملها خلقت هواك كما خلقت هوى لها
منعت تحيتها فقلت لصاحبي ما كان أكثرها لنا .. و أقلها


س: نقدك للكاتب أو الكتاب؟


هبه : انه مو مرتب .. يعني لو حط كل شخصية مع بعض كان افضل..
نجد: لو يكون فيه تسلسل في الأفكار مثلا بناء على المرحلة العمرية !!..
و نقدي للكتاب هذا واكثر الكتب المترجمة عندنا " الكتاب الأكثر مبيعاً " الكتاب الأكثر مدري ايش .... هنا كاتب الأكثر متعة .. و لكنه صراحة أبداً ما يعكس هذا الشعور ..
هبه:رغم اللخبطة اللي فيه يعطيك خلاصة في النهاية
أبرار: عجبني انهم كانوا يناقشون أستاذتهم
مشاعل تتكلم عن التعليم التعاوني
و بالخارج الآن يعتمدون على التعليم البنائي

1 comment:

حنيـــن said...

السلام عليكم ورحمة الله وبركاته

هنئيا لنا بكن ايتها الفاضلات .. فمن حملن هم الامة لهن احق واجدر بها ... سعدت بهذه المجموعة الطيبة والتي تركت لنا اثرا في مجموعة قارئ اليوم قائد الغد في الفيس بوك ... اتمني مزيد من التواصل والمتابعة لتعم الفائدة لنا جميعا ... وان شاء الله لنا هناك لقاء قريب ... اختكم حنين